„სამეფო ოჯახის დაპირისპირებაში სახელმწიფო უნდა ჩაერიოს და თავისი სიტყვა თქვას, ორივეს უნდა აეკრძალოს სამეფო ორდენების დარიგება“ – აცხადებს „მედიაცენტრ მთავართან“ ინტერვიუში საქართველოს საპატრიარქოს „ეთნოგენეტიკის კვლევითი ცენტრის” ხელმძღვანელი გიორგი ანდრიაძე.
მისი შეფასებით, ბაგრატიონთა შორის არსებული დავა პოლიტიზებული საკითხია და მონარქიის პოლიტუკურ იდეას უკავშირდება, რის გამოც მისი მოგვარება სახელმწიფოს კომპეტენციაა.
ანდრიაძე ცალსახად აცხადებს, რომ ნუგზარ ბაგრატიონ-გრუზინსკი ქართველ მეფეთა შთამომავალია, რის დასამტკიცებლადაც ბაგრატიონთა ნამარხი ძვლების ანალიზი და მცირედი თანხაა საჭირო.
აქვთ თუ არა ბაგრატიონებს უფლება, საქართველოს სამეფო სახლის სახელით ჯილდო დაარიგონ, შეუძლია თუ არა საქართველოს საპატრიარქოს, მხარეებს არსებული დავის მოგვარებაში დაეხმაროს და ვინ არის იმერეთის მეფის პირდაპირი შთამომავალი? – აღნიშნულ და სხვა საინტერესო საკითხებზე „მედიაცენტრ მთავართან“ გიორგი ანდრიაძე საუბრობს.
გიორგი ანდრიაძე: ეს არის პოლიტიკური საკითხი და უკავშირდება მონარქიზმის პოლიტიკურ იდეას. სასამართლო ვერ გადაწყვეტს ამ დავას. ეს ორი შტო რომ დავობს, იმერეთის ბაგრატიონმა რა დააშავა? ეს ორი პიროვნება რატომ დავობს? ქვეყანაზე უამრავი მეფეა. ბაგრატიონები ან კონსენსუსის გზით უნდა მივიდნენ იქამდე, რომ დავა შეწყდეს, ან ეს საკითხი სახელმწიფომ უნდა გადაწყვიტოს. ორდენი რიგდება საქართველოს სამეფოს სახელით და ყველას უნდა ჩამოერთვას სამეფო ტიტულის გამოყენების უფლება, ხოლო ვინც გამოიყენებს, გამოცხადდეს თაღლითად. საქართველოს სამეფო ოჯახის სახელით ნუ დაარიგებენ ორდენებს და ნუ ივლიან აქეთ-იქით, თორემ თავისი გვარის სახელით, ვისაც რა უნდა, ის აკეთოს.
სახელმწიფო თუ არ ჩაერია, ის სამი „საცოდავი“ მოსამართლე არაკომპეტენტურია, განსაზღვროს ვის აქვს უფლება საქართველოს სამეფო სახელით არიგოს ჯილდოები და ვის არა!
სახელმწიფო არის მოსამართლე ასეთ საკითხებში, მას შეუძლია მოდავედ გამოვიდეს და არა სასამართლოს.
„მედიაცენტრი მთავარი“: და მაინც, ვის აქვს საქართველოს სამეფო ოჯახის ტიტულის გამოყენების უფლება?
გიორგი ანდრიაძე: ფაქტი ერთადერთია, რასაც ყველა უნდა აღიარებდეს, რომ საქართველოს უკანასკნელი მეფეების შთამომავალი არის ნუგზარ ბაგრატიონი, მაგრამ საქმე იმაშია, რომ დასავლეთ საქართველოში არსებობს კიდევ ერთი ბაგრატიონი, რომელიც იმერეთის მეფის შთამომავალია. ეს არის რეალობა. მუხრან-ბატონი კი ბაგრატიონების ერთ-ერთი სათავადო შტოს წარმომადგენელია. მე მგონი, სავსებით ნათელია ყველაფერი.
რაზე ვდავობთ? თუ ნუგზარ ბაგრატიონი მეფის შთამომავალი არ არის, ეს იმას ნიშნავს, რომ მუხრან-ბატონს შეუძლია გაავრცელოს ეს დოკუმენტები? ხელი მოაწეროს?
საქართველოს სახელმწიფომ და გინდა სასამართლომ, ცალსახად უნდა განაცხადოს, რომ არც დავით მუხრან-ბატონს და არც რომელიმე ბაგრატიონს, ამ ტიტულის გამოყენების უფლება არ აქვს და თუ ეს მაინც შესაძლებელია, მაშინ ამის უფლება შეიძლება ჰქონდეს მხოლოდ ნუგზარ ბაგრატიონ-გრუზინსკის.
კიდევ ერთხელ ვამბობ, რომ მეფეების შთამომავალი არის ნუგზარ ბაგრატიონი, მეფე რასაც ჰქვია და მეორე კიდევ, იმერეთში მცხოვრებ პიროვნებაზეა ლაპარაკი, ხოლო რაც შეეხება მუხრან-ბატონებს, ეს არის ჩვეულებრივი სათავადო შტო, რომელიც არის გვარად ბაგრატიონი.
„მედიაცენტრი მთავარი:“ იმერეთის მეფის შთამომავალი საზოგადოების ფართო ნაწილისთვის უცნობია, ვისზეა საუბარი?
გიორგი ანდრიაძე: ეს არის 35 წლამდე ახალგაზრდა კაცი ირაკლი ბაგრატიონი, იმერეთის მეფეთა პირდაპირი შთამომავალი, როგორც ანალიზის პასუხმა აჩვენა. საზოგადოებისთვის შეიძლება უცნობია, მაგრამ ვინც მონარქიის ისტორიითაა დაინტერესებული და ამ საკითხშია გარკვეული, ყველამ იცის. ირაკლი ბაგრატიონი ამჟამად თბილისში ცხოვრობს, სასულიერო აკადემია აქვს დამთავრებული.
„მედიაცენტრი მთავარი:“ მაინც რისი მომცემია, რა ძალა აქვს ამ სამეფო ორდენით დაჯილდოებას და ღირს თუ არა ამის გამო ბრძოლა, საერთოდ?
გიორგი ანდრიაძე: ბევრ ქვეყანაში არის მონარქიული წყობილება. ესპანეთია თუ ბრიტანეთი, გნებავთ, საბერძნეთი, ბულგარეთი თუ ოსმალეთის სასულთნო, ამ ტიტულის მქონე ადამიანებს ყველგან დიდი პატივით იღებენ. პრესტიჟულიც არის და უზარმაზარი რესურსია ამ ტუტულში.
აქ ფურცლებზე კი არ მიდის დავა, აქ დავა მიდის სერიოზულ პრეტენზიაზე, თუ მსოფლიოს სხვადასხვა მონარქმა ვინ მიიღოს საქართველოს ტახტის მემკვიდრედ. თავისი წრე აქვთ ამ ადამიანებს და ამ წრეში მოძრაობა პერსპექტივაც არის და ბიზნესიც.
„მედიაცენტრი მთავარი:“ თანხის მხრივაც გაჩნდა ბრალდება, რომ თითქოს, ეს ორდენები იყიდება…
გიორგი ანდრიაძე: ეს ნამდვილად არ ვიცი, მაგრამ ნებისმიერ შემთხვევაში, საქართველოს სამეფო სახლის სახე ვინ იქნება, საქართველოს რესპუბლიკისთვის უმნიშვნელო არ უნდა იყოს.
„მედიაცენტრი მთავარი:“ საქართველოს რესპუბლიკისთვის ის მდგომარეობაც საკმაოდ დამამცირებელია, რა რეჟიმშიც ვიმყოფებით, სამეფო ოჯახის დავას იხილავს სასამართლო…
გიორგი ანდრიაძე: ფაქტი, თავისთავად, ძალიან ცუდია და მორიგი მინუსია ქვეყნის იმიჯისათვის. ზოგი ერთ მხარეს არის, ზოგიც – მეორე მხარეს, მე კი მივუთითებ სახელმწიფოს, რომ ხელისუფლება მოვალეა, ეს დავა დაამთავროს, რადგან სასამართლო იძულებული იქნება, გადაწყვეტილება მიიღოს, მაგრამ ეს არ იქნება დავის დამთავრების საფუძველი. დავა უნდა დაასრულოს სახელმწიფომ, მან უნდა შეკრიბოს რამდენიმე კონპეტენტური ადამიანი და გადაწყვეტილება მიიღოს, რაც ჩემი აზრით, ძალიან მარტივი და ლოგიკურია.
ჯერ ერთი, რომელი მუხლის მიხედვით უნდა იმოქმედოს მოსამართლემ, როცა აღნიშნული დავა კანონმდებლობის არცერთ მუხლს ეს არ შეესაბამება?!
ამიტომ, მე კიდევ ერთხელ მოვუწოდებ ხელისუფლებას, შექმნას კომისია, დაუძახოს ამ ხალხს და გადაწყვიტოს საკითხი.
„მედიაცენტრი მთავარი:“ ფლობთ ინფორმაციას, რომ საპატრიაქოს ორივე მხარესთან ჰქონდა მოლაპარაკება პრობლემის მოსაგვარებლად, სასამართლოს გარეშე, მაგრამ არ მოხერხდა. თქვენ როგორ ფიქრობთ, უნდა ჩაერიოს თუ არა საპატრიარქო ამ საკითხში?
გიორგი ანდრიაძე: არ მგონია, საპატრიარქომ ეს შეძლოს, თუ მხარეები თანახმა არ იქნებიან, ვინაიდან, გაყრილი ოჯახზეა საუბარი და ორივე ცდილობს, მთავარი ტიტულისათვის იბრძოლოს.
კვლევა, რაც აქამდე გაკეთდა, დაფინანსდა საპატრიარქოს მიერ. დაახლოებით 7 წლის განმავლობაში, 1200 გვარია შესწავლილი. შედეგებით დადგინდა, რომ ქართული გენოტიპი არის მსოფლიოში უძველესი, ყველაზე ძველი გენოტიპია, რაც კი არსებობს. მთელი რიგი ერები სათავეს ქართული გენოტიპიდან იღებენ, მათ ძირში, ფესვებში დგას ქართული გენები და შემიძლია გითხრათ, რომ აი იქ, არის ნუგზარ ბაგრატიონის გენიც. უძველესია ის გენი, არ არის ახალი.
„მედიაცენტრი მთავარი:“ სასამართლოს თემა ახსენეთ, კონკრეტულად რას ელოდებით სასამართლოსგან?
გიორგი ანდრიაძე: მგონია, რომ ჩიხში შევა, ან საქმეს გადასცემს ბოლო ინსტანციას. ბოლო ინსტანცია მიიღებს გადაწყვეტილებას, რომ აეკრძალოს ორივე მხარეს ასეთი რამე, ან იმ კუთხით გაიწელება საკითხი, რომ დნმ-ის ანალიზი გახდეს საჭირო.
“მედიაცენტრი მთავარი:“ თუკი ასე დადგება საკითხი, რას უნდა შეადარონ ეს დნმ, სვეტიცხოველში არსებული ქართველ მეფეთა საძვალეები უნდა გადათხარონ თუ თურქეთსა და ასტრახანში დაკრძალული ბაგრატიონების საფლავები?
გიორგი ანდრიაძე: სვეტიცხოველი არ გამოვა, მთელი სვეტიცხოველი გვექნება მაშინ ასაყრელი, რაც ტექნიკურად შეუძლებელია. მოგეხსენებათ, რომ ასტრახანში და თურქეთში არის ბაგრატიონთა საძვალე. ასტრახანში გვყავს ორი მეფე: თეიმურაზი და ვახტანგი. თეიმურაზ მეორე არის პირდაპირი შტო ამ კახეთის ხაზისა, მაგრამ საქმე ისაა, რომ ასტრახანში არ გვაძლევენ ნებას, შეგვიშვან და აგვაღებინონ ეს ანალიზი, მაგრამ თურქეთში, რომელიც ასე ვთქვათ, მეგობულად დეკლარირებული სახელმწიფოა, ძალიან ბევრი ბაგრატიონის საფლავია და იქ შეიძლება, გაკეთდეს.
თურქეთში ამჟამად მიმდინარეობს ოშკის და იშხანის სარესტავრაციო სამუშაოები, სადაც არის ბაგრატიონთა საძვალე და თუ სახელმწიფოს ამისთვის არ სცალია, ალბათ უფრო კერძო უნივერსიტეტების იმედი შეიძლება გვქონდეს, რომ ორ საქმეს გააკეთებენ, ნათელს მოჰფენენ როგორც ამ დავას, ასევე საქართველოს ისტორიის ძალიან საინტერესო დეტალებს. თუ რა ჰაპლო-ჯგუფი ჰქონდათ ბაგრატიონებს, ადვილი გასარკვევია და ამის გაკეთება თურქეთშია შესაძლებელი. იქ ქართველი მეცნიერებიც მუშაობენ და ისინი დაგვეხმარებიან, მთავარია, ქალის ნეშტი არ აიღონ.
რამდენიმე ნიმუშს გადავაგზავნით ევროპაში, გადაიხდიან მცირე თანხას და შედეგად, ძალიან საინტერესო სურათს მივიღებთ. ერთი ნიმუშის გაკეთება 3-დან 5 ათას დოლარამდე ჯდება, დნმ-ის სირთულიდან გამომდინარე.
„მედიაცენტრი მთავარი:“ როგორ ფიქრობთ, მზად არის ჩვენი ქვეყანა ახლო მომავალში მონარქიულ წყობილებაზე გადასასვლელად?
გიორგი ანდრიაძე: რა თქმა უნდა არა, არანაირად! მზად არა ვართ, რაც თუნდაც ამ ბოლოდროინდელმა ვითარებამაც აჩვენა. ჯერ უნდა შედგეს და უნდა ჩამოყალიბდეს თავისუფალი, დემოკრატიული საზოგადოება, რადგან მონარქია არის ევროპული დემოკრატიის მახასიათებელი მთავარი გვირგვინი. ჩვენი საზოგადოება კი, ხელისუფლებების მიერ, სხვა კუთხით მიდის. დემოკრატიისკენ კი არა, პირიქით, ტოტალიტარიზმისკენ მიჰყავთ ქვეყანა და ფაქტობრივად, ხელით მართვაზეა გადაყვანილი საზოგადოება. მონარქი ამ შემთხვევაში, ვერაფერს გააკეთებს, ისიც ისეთივე დასმული თოჯინა იქნება, როგორიც – სხვები.
